Pontedeume

Habitantes: 8.817

Extensión: 29 km2

Casa do Concello: Rúa Real, 17. C.P. 15600
Tlf.: 981 433 054
Fax: 981 433 368

Oficina de Turismo:
Tlf.: 981 430270

Máis información na web do Concello de Pontedeume

 

Pontedeume


A nobre estirpe galega máis importante do norte da Galiza no Medievo tivo o seu berce en Pontedeume, terra codiciada pola súa xeografía estratéxica en todas as épocas. Como o seu nome indica, a seña de identidade por excelencia de Pontedeume é a súa ponte de pedra sobre o río Eume remodelada no século XIX. A ponte orixinal mandada construír por Fernán Pérez de Andrade "O Bo" tiña 79 arcos e foi a máis grande de Galicia ata a época moderna. O principal atractivo desta vila reside na perfecta conxunción de río, mar e montaña ó abrigo da bravura atlántica no fondo da ría de Ares. Seguindo o curso da desembocadura do río Eume nas ladeiras do monte Breamo, chegamos ao Parque Natural das Fragas do Eume, un dos últimos bosques atlánticos europeos, relicto da Era Terciaria, que conserva o manto vexetal autóctono de carballos, castiñeiros, loureiros, érbedos e acivros. O espazo natural na desembocadura do río, a praia de Ber e as vistas panorámicas dende Breamo ou o Castelo dos Andrade, sempre vixiante, engrandecen a beleza desta vila señorial. Pontedeume é unha das poboacións polas que transcorre o segundo tramo do Camiño Inglés e ligados a esta ruta espiritual están as igrexas de Santiago de Pontedeume, San Miguel de Breamo, San Pedro de Vilar, San Martiño de Andrade, San Xoán de Vilanova, Santa María de Castro e Santa María de Miño. Son citas ineludibles do peregrino que marcha cara a cidade de Santiago. Ademais de toda a riqueza histórica e paisaxística, Pontedeume conserva un magnífico casco histórico, onde as estreitas rúas peonís agochan palacios, os restos da antiga muralla, soportais de madeira con brancas galerías, igrexas, a Torre dos Andrade e outras xoias arquitectónicas herdeiras da nobreza medieval. Cómpre percorrer tamén o paseo marítimo que ofrece estupendas vistas sobre a ría, as lonxas de Raxoi e as praias e calas espalladas pola súa costa. Da cultura castrexa tamén quedaron pegadas significativas en forma de pezas escultóricas ou de orfebrería coma os torques de Centroña e de San Martiño do Porto. De feito dos restos atopados no litoral do municipio hai catalogados once xacementos (6 castros, 3 túmulos e 2 xacementos romanos): Zopazos, Centroña e Castro das Insuas. Ademais, Pontedeume é un pobo para o descanso, xa que posúe zonas de campo onde perderse facendo rotas en piragua, a cabalo, en bicicleta e a pé polos camiños que percorren un dos ecosistemas máis representativos do Eume, as Fragas.


Que ver:


O torreón dos Andrade, no corazón da vila, único resto do grandioso pazo do século XIV construído por Fernán Pérez de Andrade “O Bo”. O torreón é un dos mellores exemplos de arquitectura militar medieval en Galicia, pero o que destaca especialmente é o escudo na súa fachada no que se recollen os brasóns das familias de Andrade e Lemos.

O Castelo de Andrade erixido por Fernán Pérez de Andrade “O Bo” a 309 metros de altitude, domina todo o val das Mariñas dende unha posición moi estratéxica. Deste castelo aínda se conserva a gran maioría da Torre da Homenaxe, a entrada do castelo onde estivo o escudo dos Andrade e outras partes desta extraordinaria fortaleza. No contorno deste castelo foi derrotado o primeiro alzamento popular liderado por Roi Xordo na península contra a opresión dos señores feudais.

A actual ponte que cruza o río Eume, sustitúe a unha antiga ponte medieval composta por 79 arcos, con dúas torres, capela e un hospital para peregrinos mandada construír por Fernán Pérez de Andrade “O Bo”. Foi unha das máis longas pontes de Europa e considerada unha das máis importantes polo seu carácter estratéxico.

A igrexa de Santiago mandada construír por don Fernando de Andrade no primeiro terzo do século XVI está cuberta con bóveda estrelada e destaca o Santiago sedente de granito policromado de finais do século XIV, e o retablo renacentista dourado en 1564 polos descendentes de don Fernando.

A fermosísima igrexa de San Miguel de Breamo, curioso exemplo do románico galego do século XII, monumento histórico artístico dende 1931. Tradicionalmente faise a ascensión ao monte dende Pontedeueme o día 8 de maio e unha vez alí, danse nove voltas arredor da igrexa en completo silencio para "botar as meigas". Nas inmediacións da igrexa hai unha área recreativa onde descansar e gozar das fermosas vistas panorámicas.

A Casa do concello, un dos edificios máis emblemáticos do casco histórico da vila ligado ó goberno que os Andrade exercían na vila, mesmo conserva o escudo da familia e dentro do edificio áchanse pezas escultóricas que representan os emblemas da casa dos Andrade, un oso e un xabaril, antes situadas na ponte que cruza o río Eume.

O edificio do Mercado de estilo colonial do século XX que ocupa parte do espazo do antigo Pazo dos Andrade. O trazado exterior foi asoportalado con columnas de cantería de estilo clásico e conta con dúas fachadas simétricas de grandes dimensións. Nel pódense atopar produtos agroalimentarios da comarca de grande calidade e produtos derivados da pesca tradicional local.

A Lonxa de Raxoi, edificio de pedra dividido en dez bodegas que foi mandado construír na segunda metade do século XVIII polo arcebispo eumés Bartolomeu Raxoi e Losada no que foi a casa natal do seu pai, o boticario Nicolás Raxoi. Na fachada conviven elementos típicos da escola compostelá con outros novos, máis clasicistas, de influencia francesa.

A rede de carreiros e rotas de sendeirismo vén revelar o gran valor recreativo de espazos naturais tan auténticos como as fragas da Ventureira ou os cumes de Pena Cavada polo parque natural das Fragas do Eume.

Toda a costa dende Boebre ata Ver, recorrendo os acantilados que alternan coas pequena calas recónditas. Destacan a Punta Carboeira e a Punta Camoureda dende onde se aprecia a extraordinaria fisonomía desta costa e a illa da Carboeira. Algunhas das praias que se atopan neste fermoso recorrido son a de Ver, Centroña e Perbes.



Recursos turísticos:

Casa rural Castelo de Andrade

e turismo activo: Buceo e Piragüismo

¿onde comer?(Restaurantes)

 

 

Pechar